السيدة أميمة سمير جبر ا، احدى ضحايا البلطجة الامنية فى كفر العلو( ترقد الآن في قسم الكسور بالدور الخامس بمستشفى حلوان العام.. قدمت على طلب علاج على نفقة الدولة لكن طلبها، دونا عن كل الطلبات ضاع في ردهات الوزارة!!) ،تقول :

"كنا عاوزين نوصل صوتنا لماما سوزان.. اليافطة كان مكتوب عليها يا ماما سوزان هدموا بيوتنا.. واحد من الحرس.. كانوا اتنين لابسين مدني.. قال لي: دا انت بقى زعيمة.. قلت له: لأ، احنا غلابة وهدوا بيوتنا.. جه رئيس حي حلوان، وجيه الدخاخني.. وأخد الشكوى.. قلت له: طيب خد واحدة بس منا تكلمها.. قال لي: انتي متخيلة إن ممكن توصلوا.. دا انتو تتخرموا بالرصاص.. وبعدين قالوا انها خرجت وراحت الرعاية المتكاملة.. جرينا تاني.. منعونا .. قلنا لهم.. احنا مش خطر.. ده احنا حريم وأطفال..

احنا كنا واقفين قدام قصر الثقافة في حلوان.. جه الأمن وعمل كردون.. كنا واقفين بأدب.. قعدوا يزقوا فينا.. قلت له سيبنا احنا ستات.. واحد من الأفندية اللي لابسين مدني قال لي ارجعوا ورا وسلموا صور البطاقة.. ده خلاص الموكب مشي.. فعلا مشينا.. قعدنا على الإسفلت ناكل..

طلعت واحدة ست عندها ييجي 60 سنة وابتدت معانا خناقة من غير أي سبب.. مسكتني من صدري وهزتني جامد وقعدت تزعق لأختي وتقول لها انتي مجنونة.. دافعت عن أختي.. مسكتني من صدري وفجأة شفت اتنين من الأمن.. منهم الراجل اللي أخد مني الشكوى ومعاهم واحد لابس مدني وشايل شومة ونزلوا فينا ضرب.. أنا انضربت بالعصا والجزم بالذات على رجلي.. فجأة لقيت رجلي مش موجودة.. اتتكسرت.. والقدم لفت لورا والضرب نزل على راسي وكتافي.. كلي كدمات..

كان فيه تلات أمناء شرطة واقفين.. استنجدنا بيهم.. ما تدخلوش.. الستات دخلوا نقطة الشرطة (نقطة شرطة الزلزال) وقعدوا يصرخوا انهم ييجوا يوقفوا الضرب.. كان هناك 3 أنفار ردوا عليهم.. قالوا لهم امشوا.. طلبوا يعملوا محضر.. رفضوا.. وما حدش اتحرك يمنع الضرب عنا..

عرفت بعدها ان الناس اللي جريت مسكوهم بعد كام متر وضربوهم تاني ورا كشك العيش.. شرشحة وضرب بالجزم والعصيان الفاظ قذرة.. "

بعد إصابة السيدة أميمة قام الأهالي باستدعاء سيارة الإسعاف نقلتها وأخريات إلى مستشفى حلوان العام.. وقبل أن تتلقى العلاج كان هناك أمين الشرطة يأخذ أقوالها:

"الأول عملوا لي محضر شرطة.. أمين شرطة.. قلت فيه كل حاجة.. الساعة واحدة ونص بالليل جه ياسر الشناوي، ضابط مباحث في قسم حلوان، وعملوا محضر تاني وقعت عليه من غير ما أقراه.. الشيء الغريب إنهم تاني يوم عملوا محضر تالت.. جه محمد فهمي (نائب مأمور قسم حلوان).. سين وجيم.. وأنا مش شايفه بيكتب إيه.. مضيت تاني..

محمد فهمي قال لي عاوزين نخلص الموضوع واتكلم في التليفون وقال لواحد: الموضوع خلاص وقف.. الموضوع اللي عندك في المحضر التالت.. كان رافض يتكلم معايا.. ويتكلم بس مع حنان.. (اصابة في الوجه والأنف).. وكل ما أحاول اتكلم يقول لي ده انتي بقى الزعيمة وانتي اللي قالبه الدنيا وانتي اللي جايبه الصحفيين.. وبعدين ابتدا يضحك معايا.. بس كان بيهددني.. قال لي: مش انت اللي جوزك كان في العشه بيشرب بانجو مع واحدة ست؟؟.. ما تزعليش.. دا أنا بس بأهزر.. ده انتي تلاقي جوزك دفع ليهم 100 جنيه ووصى عليكي عشان حد يضربك.. اشتكينا في كل حتة.. مافيش فايدة.. "